KOLDING: Dowladda Denmark ayaa si weyn hoos ugu dhigtay canshuurta laga qaado korontada (elafgift) laga bilaabo 1-da Janaayo ee sanadkan 2026. Tallaabadan ayaa faa'iido u ah dhammaan dadweynaha, balse milkiilayaasha baabuurta korontada (El-biler) ayaa loogu baaqayaa inay si gaar ah u feejignaadaan isbeddelka cusub.
Isbeddelkan ayaa yimid kadib markii la go'aamiyay in canshuurta korontada laga dhigo midda ugu hoosaysa ee suurtogalka ah inta lagu jiro sannadaha 2026 iyo 2027.
Hoos u dhac ballaaran oo ku yimid qiimaha
Wixii ka horreeyay 31-kii Disembar, canshuurta korontadu waxay ahayd 90 øre (qiyaastii $0.13 USD) halkii kilowatt saac (kWh).
Hase yeeshee, laga bilaabo 1-da Janaayo, canshuurtaas waxay hoos ugu dhacday 1 øre (qiyaastii $0.001 USD) oo kaliya, taas oo ah heerka ugu hooseeya ee Midowga Yurub (EU) oggol yahay. (F.G: 1 øre waa in ka yar hal senti oo doolar).
Sida ay sheegtay xarunta cilmi-baarista ee Videncentret Bolius, qoyska ka kooban laba waalid iyo laba carruur ah ayaa sannadkii kaydsan kara lacag u dhaxaysa 4,000 ilaa 6,000 oo karoon (qiyaastii $580 ilaa $870 USD) isbeddelkan awgiis.
Casper Brejnbjerg Olsen, oo ah agaasimaha adeegga macaamiisha ee shirkadda tamarta Ewii, ayaa yiri:
"Tani waa qiimo dhimis aad u weyn, waana adag tahay in siyaabo kale lacag intaas la eg looga tashiilo biilka korontada."
Isbeddelku wuxuu u dhacayaa si toos ah
Macaamiisha loogama baahna inay sameeyaan wax codsi ah si ay u helaan qiimo dhimistan. Shirkadaha korontada ayaa si toos ah u joojinaya jarista canshuurtii hore.
"Waa shaqadeenna bixiyeyaasha korontada ah inaan dowladda u qaadno canshuurta. Sidaas darteed, si toos ah ayaan u fulinaynaa inaanan macaamiisha ka qaadin wax ka badan halka øre ee canshuurta ah," ayuu yiri Casper Brejnbjerg Olsen.
Walwalka ku aaddan kororka qiimaha kale
Inkastoo canshuurtu dhacday, waxaa jiray warar sheegaya in shirkadaha qaar ay kordhin karaan qiimaha asalka ah ee korontada. Shirkadda Ewii ayaa xaqiijisay inaysan qorshaynayn wax qiimo koror ah, inkastoo ay ogyihiin in shirkado kale laga yaabo inay tallaabadaas qaadeen.
"Macaamiil badan ayaa nala soo xiriiray iyagoo walwalsan, laakiin annagu qorshaha nooguma jirto inaan qiimaha kordhinno," ayuu raaciyay Casper.
Digniin muhiim ah: Dadka wata Baabuurta Korontada (El-biler)
Qodobka ugu muhiimsan ee maqaalku diiradda saarayo waa xaaladda dadka haysta baabuurta korontada ku shaqeeya.
-
Horey: Dadka haysta heshiiska adeegga (service abonnement) ee dabka baabuurta waxaa loo soo celin jiray canshuurta korontada (refusion).
-
Hadda: Maadaama canshuurtii dowladda meesha laga saaray (ay noqotay 1 øre ama $0.001 USD), ma jirto lacag canshuur ah oo dib loo soo celinayo.
Maxaa la gudboon dadkaas? Milkiilayaasha baabuurta korontada waa inay dib u eegaan heshiisyadooda. Waxaa laga yaabaa inay bixinayaan lacag adeeg (subscription) oo aysan hadda faa'iido ugu jirin, maadaama aysan helayn lacagtii canshuur celinta ee horey ugu iman jirtay.